અદાણીની નેટવર્થમાં 20 અબજ ડોલરનું ધોવાણઃ ધનિકોની યાદીમાં 7મા ક્રમે પહોંચી ગયા.

અદાણી જૂથની કંપનીઓ વિશે અમેરિકન શોર્ટ સેલરે નેગેટિવ અહેવાલ આપ્યો ત્યારથી અદાણીના શેરોમાં ભયંકર વેચવાલી ચાલે છે. અદાણી ગ્રૂપના વડા ગૌતમ અદાણી ની સંપત્તિમાં ઝડપભેર 20.8 અબજ ડોલરનું ધોવાણ થયું છે. તેના કારણે તેઓ વિશ્વના ધનિકોની યાદીમાં ત્રીજા સ્થાનેથી ગગડીને સીધા સાતમા ક્રમે પહોંચી ગયા છે. હિન્ડનબર્ગ રિસર્ચ ના અહેવાલના પગલે આજે પણ અદાણીની કંપનીઓના શેરમાં 5થી 20 ટકાનો ઘટાડો થયો હતો. ફોર્બ્સ રિયલ ટાઈમ બિલિયનર્સ ઈન્ડેક્સ પ્રમાણે અદાણીની નેટવર્થ આજે 20.8 અબજ ડોલરથી વધારે ઘટીને 98.5 અબજ ડોલર સુધી જતી રહી છે.

એટલે કે ફક્ત એક દિવસમાં તેમની સંપત્તિમાં 17.40 ટકાનો ઘટાડો થયો છે. હજુ ત્રણ દિવસ અગાઉ ગૌતમ અદાણી લગભગ 120 અબજ ડોલરની નેટવર્થના માલિક હતા અને હવે તેમની નેટવર્થ 100 અબજ ડોલરથી નીચે જતી રહી છે.

બર્નાડ એર્નોલ્ટ ફેમિલી નંબર વન પર
ફોર્બ્સની ધનિકોની યાદીમાં સૌથી ઉપર બર્નાડ એર્નોલ્ટ ફેમિલી છે જેની પાસે 212 અબજ ડોલરની સંપત્તિ છે. ત્યાર પછી ટેસ્લાના માલિક ઈલોન મસ્ક (Elon Musk) છે જેની સંપત્તિ 170 અબજ ડોલર છે. મસ્કની સંપત્તિમાં આજે એક દિવસમાં 10 અબજ ડોલરનો વધારો થયો છે. એમેઝોનના સીઈઓ જેફ બેઝોસ (Jeff Bezos) આ લિસ્ટમાં હવે ત્રીજા ક્રમે છે જેઓ 122.4 અબજ ડોલરની સંપત્તિ ધરાવે છે.

બિલ ગેટ્સથી પણ ઓછી સંપત્તિ
અદાણી હવે માઈક્રોસોફ્ટના સ્થાપક બિલ ગેટ્સ (Bill Gates)થી નીચે ચાલે છે, જેમની સંપત્તિ 104 અબજ ડોલર છે. ગયા વર્ષમાં અદાણી જૂથના શેરોમાં જોરદાર તેજી આવી ત્યારે તેઓ ફોર્બ્સની ધનિકોની યાદીમાં બીજા ક્રમે પહોંચી ગયા હતા. થોડા દિવસો અગાઉ તેઓ ઈલોન મસ્કને પણ બહુ આસાનીથી પાછળ રાખી દેશે તેમ લાગતું હતું, પરંતુ હિન્ડનબર્ગ રિસર્ચના રિપોર્ટ પછી બધું બદલાઈ ગયું છે.

હિન્ડનબર્ગ રિસર્ચના રિપોર્ટમાં અદાણીના શેરોમાં ફ્રોડ થયો હોવાનો આરોપ મુકાયા પછી સ્ટોક્સ 5થી 20 ટકા સુધી ઘટ્યા છે. હિન્ડનબર્ગનો દાવો છે કે અદાણી જૂથના શેરોમાં 85 ટકા સુધી ઘટાડો આવી શકે છે કારણ કે તેના ભાવમાં ચેડા કરવામાં આવ્યા છે.

લાંબા સમય સુધી અદાણી ત્રીજા ક્રમે રહ્યા
વિશ્વના ધનિકોની યાદીમાં ગૌતમ અદાણી લાંબા સમય સુધી ત્રીજા સ્થાને રહ્યા હતા. હવે તેમની જગ્યાએ એમેઝોનના જેફ બેઝોસ આવી ગયા છે જેઓ 122 અબજ ડોલરની સંપત્તિ ધરાવે છે. ફોર્બ્સની ધનિકોની યાદીમાં ગૌતમ અદાણીના હરીફ અને રિલાયન્સ ઈન્ડસ્ટ્રીઝના ચેરમેન મુકેશ અંબાણી 11મા સ્થાને છે. મુકેશ અંબાણી 83 અબજ ડોલરની નેટવર્થ ધરાવે છે.

અદાણીના શેર કેટલા ટકા ઘટ્યા
આજે અદાણી જૂથની કંપની અદાણી ટોટલ ગેસનો શેર 20 ટકા ઘટીને 2932 થયો હતો જ્યારે અદાણી ગ્રીનનો શેર 19 ટકા ઘટીને 1488 પર હતો. અદાણી એન્ટરપ્રાઈઝિસનો શેર 8 ટકા ઘટ્યો હતો. જ્યારે અદાણી પોર્ટ્સનો શેર 10 ટકા ઘટીને બાવન સપ્તાહની નીચી સપાટીએ હતો. અદાણી ટ્રાન્સમિશન પણ 17 ટકા, અદાણી પાવર 5 ટકા અને અદાણી વિલ્મર 5 ટકા ઘટ્યા હતા.