વોટરપાર્ક માં અચાનક તૂટી ગઈ રાઈડ… 30 ફૂટ ઊંચે થી પડ્યા લોકો… વિડિઓ થયો વાયરલ

ઈન્ડોનેશિયાના કેંગેરન પાર્કમાં એક ભયાનક અકસ્માત થયો છે. વોટરપાર્કમાં અડધી સ્લાઈડ બાદ લોકો 30 ફૂટ નીચે પડ્યા હતા. 7 તારીખ ના રોજ બનેલી આ ઘટનાનો ભયાનક વીડિયો સોશિયલ મીડિયા પર વાયરલ થઈ રહ્યો છે. જેમાં ટ્યુબ સ્લાઈડનો એક ભાગ તૂટી પડતો જોઈ શકાય છે. પર્યટકો કોંક્રીટના ફ્લોર પર પડતાં જ ચીસો પાડતા જોવા મળે છે.

ડેઈલી સ્ટારના અહેવાલ મુજબ સ્લાઈડની અંદર ફસાયેલા 16 લોકોમાંથી 8 લોકો ગંભીર રીતે ઘાયલ થયા છે અને તેમને હોસ્પિટલમાં દાખલ કરવામાં આવ્યા છે. ત્રણ લોકોને ફ્રેક્ચર થયા હતા. તે જ સમયે, વોટર પાર્ક પ્રશાસને જણાવ્યું હતું કે આ અકસ્માત એટલા માટે થયો હતો કારણ કે સવારી દરમિયાન જ સ્લાઇડ ક્ષતિગ્રસ્ત અને નબળી પડી ગઈ હતી. વોટર પાર્ક મેનેજમેન્ટે જણાવ્યું હતું કે નવ મહિના પહેલા મોટાભાગની સ્લાઇડ્સનું નિરીક્ષણ કરવામાં આવ્યું હતું.

આ ઘટના પછી, સુરબાયા શહેરના ડેપ્યુટી મેયરે ભવિષ્યમાં આવા અકસ્માતોને રોકવા માટે નિરીક્ષણ કરવા માટે હાકલ કરી છે. મેયર એરી કહ્યાદીએ જણાવ્યું હતું કે આ ઘટનામાં ઘાયલ થયેલા તમામ લોકોની સારવાર અને સંભાળ રાખવામાં આવશે. જોકે, તેમણે કહ્યું કે તમામ ઘાયલોની હાલત સારી છે.

આ વીડિયોને યૂટ્યૂબ પર શેર કરવામાં આવ્યો છે. આમાં લોકો નીચે પડતા જોઈ શકાય છે. જણાવવામાં આવી રહ્યું છે કે અકસ્માતનું કારણ સ્લાઈડની બાજુમાં પડેલી તિરાડ છે. સ્લાઈડના ઓવરલોડને કારણે સ્લાઈડ તૂટી ગઈ અને બધા નીચે પડી ગયા. આ સાથે વોટર પાર્કમાં મેઇન્ટેનન્સ પર પણ પ્રશ્નાર્થ સર્જાયો છે.

એવું કહેવામાં આવી રહ્યું છે કે નવ મહિના પહેલા અહીં મેઈન્ટેનન્સનું કામ કરવામાં આવ્યું હતું. ત્યારથી અત્યાર સુધી અહીંની સ્લાઈડ્સ એક વખત પણ રિપેર કરવામાં આવી નથી. જેના કારણે આ અકસ્માત થયો છે.